الشغل الريموت

الكلام ده بناءً على تجربة شخصية وكان ما بين 2019 ل2020 ومش بديل عن نصيحة قانونية -خصوصاً في الجزء المتعلق بالضرائب-. أنا فضلت أوثق تجربتي عشان ملقتش أي مصادر لما كنت بادئ في الموضوع وأتمنى يفيد أي حد ناوي يشتغل مع شركات بره مصر.

لو مش عايز تقرا كتير ممكن تنزل للخلاصة تحت.

تجربتي

الإنشاء

في أواخر مايو 2019 كنت بدأت اتواصل مع شركة خارج مصر على فرصة عمل ريموت وطلبوا مني أنشئ كيان قانوني عشان يعرفوا يتعاملوا معايا وفهموني إن الموضوع مهم ومعتاد مع أي مبرمج خارج بلدهم.

أي شركة هتشتغل معاها غالباً هتطلب الموضوع ده وده راجع لكذا سبب:

• عشان يريحوا دماغهم من تعقيدات الضرائب في بلاد الناس اللي شغالين معاهم (قوانين الضرائب في مصر تختلف عن الهند تختلف عن غانا وهو مش هيقعد يظبط الدنيا لكل واحد شغال عنده).
• يحموا نفسهم من أي تداعايات قانونية متعلقة بالضرائب أو غيره في بلدهم فبيشترطوا عليك دايماً -حتى لو مش هتعمل كيان قانوني- إنك تتحمل دفع الضرائب الخاصة ببلدك وفي بنود في العقد بتنص على الكلام ده.
• يخلوا ذمتهم من أي ارتباطات تتعلق بتعيين موظف. يعني هو ممكن قوانين بلده تفرض عليه يأمن على الموظفين فهو لو متعاقد مع شركة هو مش مطالب غير بدفع الفواتير المستحقة لقاء العمل.

سألت طبعاً في دايرة أصدقائي واللي اعرفهم بس مفيش حد كان عنده إجابة أكيدة وكنت خايف من كذا حاجة:

1. لو مدفعتش الضرائب إيه الضرر القانوني اللي بحط نفسي فيه؟
2. لو بيتم تحويل المرتب على حساب بنكي هل بيتم الحجز عليه كون مصدر الدخل غير معلوم؟ هل هم هيعرفوا أصلاً؟!

اكتشفت فيما بعد إن مفيش خطر زي ما كنت متخيل لأن الوضع مش مقنن ومفيش مشكلة إنك تستقبل فلوس على حسابك البنكي من خارج مصر.

فقررت أروح لمحامي ودخلت على yellowpages واخترت مكتب محاماة مختص بتأسيس الشركات وتسجيل العلامات التجارية. الإستشارة كلفتني 400 جنيه [في 2019 خلي بالكم]. شرحت للمحامي الدنيا وأنا مقدم على الخطوة دي ليه وإن الشركة اللي هتعامل معاها طالبة كده. حسيت الراجل مكنش فاهم أوي لطبيعة الموضوع وإنه جديد عليه بس أنا كان هاممني موضوع الضرائب والمخاطر اللي ممكن تحصل بسببه وأكدت على النقطة دي أكتر من مرة. ففي الأخر نصحني أعمل “المنشأة الفردية” واللي على أساسها هيكون عندي سجل تجاري وبطاقة ضريبية واقدر أسدد أي ضرائب مستحقة علي وقال لي إن الإقرار الضريبي بيبقى من شهر واحد لشهر تلاتة في بداية كل سنة.

اختياري لمحامي كان صائب من حيث النصيحة القانونية لكن فهمت بعد كده إن كان ممكن أخلص نفس الخطوات من مكتب محاسبة وضرائب بتكلفة أقل بكتير.

اتفقت مع المحامي على بدء الإجراءات في إنشاء المنشأة الفردية والتكلفة كانت 6000 جنيه بس انتهت ل7000 وهنعرف ليه. الأول طلب مني أعمل توكيل وحاولت أعمله في الشهر العقاري التابع للحي بس معرفتش فبعد كده نصحني أعمله في وزارة الاستثمار. المكان منظم ومميكن وأي أجنبي بيباشر أعمال تجارية في مصر بيخلص ورقه هناك فيه.

في عندك تلت أماكن تعمل التوكيل

• الشهر العقاري التابع لبيتك
• الأندية (لو أنت عضو)
• وزارة الاستثمار

بعد خطوة التوكيل المحامي خلص كل الأوراق بس الدنيا اتعثرت في جزء وهو إن المنشأة الفردية لازم يبقى ليها مقر عمل فاضطريت اعملها على عنوان البيت والمحامي عمل عقد إيجار كأن والدي مأجر لي المكان، وكان لازم مندوب من الضرائب يجي يفحص المكان ومكوناته وكام جهاز كومبيوتر والسلم وشكل العمارة وهيحتاج وصل كهرباء وغاز، كأنك فاتح مكتب بالظبط!

صراحةً هنا حسيت إني مشيت في سكة غلط أنا شغال باللابتوت اللي معايا ودمتم مكتب إيه؟!! ونظراً لأسباب شخصية وخلافه مكنتش عايز مندوب الضرائب يجي يفحص الشقة. وتم دفع 600 جنيه للمندوب عشان يتغاضى عن الزيارة [طبعاً منصحش أي حد يعمل كده ولكن أنا بنقل تجربتي بصدق] وبكده انتهت جميع خطوات تأسيس الشركة ولكن كانت في رسوم زيادة خاصة ببعض الأوراق حوالي 200 زائد 200 “حلاوة” للي شغالين في مكتب المحاماة وبكده الموضوع قفل 7000 جنيه بالتمام والكمام.

في نفس الوقت تواصلت مع البنك ووضحت لهم إني هستقبل تحويلات من خارج البلاد، أكدوا لي إن مفيش أي مخاطر وإن مفيش حجز حصل على أي حسابات عندهم وده شئ طبيعي وفي حالة إن العملة المحولة غير عملة البلد بيتم فتح حساب تابع (suffix) بشكل تلقائي وتقدر تسحبها وتتعامل عليه زي حسابك الأساسي.

وضحت للشركة أخيراً إني انتهيت من الخطوات فبعتوا العقد على الميل ووقعته من خلال Docusign وبدأت شغل معاهم بس كان في عقبة أخيرة وهي إن المرتب مش بيتحول في نهاية كل شهر وإنما لازم أبعت Invoice.

اتخضيت وافتكرت دي ورقة مختومة وتتبعت فاكس بس طلعت PDF دوكمنت عادي بتطلب فيه أجرك نظير خدماتك وهنا نرجع لنقطة مهمة إن أنت هنا مش بتكون شغال معاهم كموظف خاضع لقوانين بلدهم من حيث اﻷجور وغيره وإنما شركة متاعقدين معاها بتعمل لهم خدمات وبتاخد أجر عليها. مديري طلب مني استخدم wavesapp عشان اجنريت الدوكمنت ده ومنظرها بيبقى عامل كده في الأخر:

الإغلاق

بعد فترة ولظروف خاصة حبيت أسيب الشغل وده كان في بداية السنة الجديدة وترافق معاها معاد الإقرار الضريبي ففكرت أرجع لنفس المحامي عشان إجراءات الضرائب لكن هو وضح لي إنهم متعاقدين مع مكتب محاسبة مختص بالضرائب ففضلت أدور على أي مكتب بشكل مباشر عشان التكلفة هتكون أعلى بدون فايدة.

نفس القصة دخلت على yellowpages واخترت مكتب محاسبة وضرائب وهنا عرفت كام نقطة مهمة:

• مكاتب المحاسبة بتقوم بشغل تأسيس الشركات ولكن بتكلفة أقل كتير من مكاتب المحاماة فلو هتعمل شركة أو منشأة فردية او غيره روح لمكتب محاسبة على طول أحسن.
• بالنسبة لنقطة الضرائب ودي كانت الهاجس الأساسي المحاسب وضح لي إن لو شغال مع شركة بره زي ما كتير بيعمل ده ميحطكش في مشكلة مع الضرائب لأن مفيش ما يثبت إنك بتتلقى الفلوس دي نظير عمل.
• هل ممكن يتحجز على الحساب البنكي بتاعي عشان الفلوس مصدرها غير معلوم؟ رده كان “الأهمية النسبية” وهو إنهم بيتم مراجعة الحسابات اللي بيدخلها أرقام كبيرة ومش هيضيعوا وقت ورا الحسابات الصغيرة ولو حصل مشكلة مع الضرائب نروح نعمل تصالح أسهل.
• بخصوص نسبة الضرائب وإزاي بتتحسب. مصلحة الضرائب مهماً قولت لهم مش هيصدقوا يعني بتقول لهم طبقاً لأرباحي الضرائب بتاعتي 1000 جنيه على سبيل المثال بيرفعوا عليك الملبغ وليكن 1500 فالبتالي هي ملهاش حسبة أوي قد ما هي لعبة حسب كلام المحاسب وعشان كده هم دايماً بيدوا أقل رقم يقدروا عليه لأن مصلحة الضرائب هتزود عليه ده اللي فهمته منه.
• مكتب المحاسبة بيعمل الإقرار الضريبي لقاء مبلغ ثابت غير مرتبط بقيمة الضرائب اللي هتستددها.
• ممكن تعمل الإقرار بنفسك. هو بيتم على موقع الضرائب أونلاين لكن طبعاً منصحش بده إلا لو أنت فاهم بتعمل إيه كويس.

أنا كنت عايز أعمل الإقرار الضريبي وأقفل الشركة فنفس الإجراء، فعملت توكيل لمكتب المحاسبة واديتوا بعض الأوراق اللي عملتها ساعة التأسيس وأهمها البطاقة الضريبية عشان تتسلم. والإغلاق والإقرار سوا اتكلفوا 1500 جنيه.

الخلاصة

الضرائب

كل الدفلبرز المصريين اللي اتعرفت عليهم اللي شغالين ريموت مع شركات أو فريلانس على Upwork أو غيره مش بيدفعوا ضرائب ولا تقريباً طرقوا الباب ده من أصله وشغالين بقالهم سنين عادي، وواضح إن في اتفاق على الموضوع ده. حابب تعمل زيهم فمش هتبقى أول واحد لكن أنا مش مسئول وده قرار أنت تتحمل مسؤوليته. وطبعاً لو حابب تمشي قانوني عندك السكة اللي أنا مشيتها ومتنساش تروح لمكتب محاسبة بدل محاماة. عامةَ أنا حاسس مفيش طريق واضح وحاجة مفهومة الواحد يعملها ياريت لو حد عنده تجربة مختلفة يشاركها أويتواصل معايا.

الفواتير (Invoices)

في بعض الشركات هتتطلب منك تبعت فواتير ليها لتحصيل أجرك، ممكن تعملها بأي طريقة أو تكتبها بLatex حتى لو حابب.

• https://github.com/Invoiced/invoice-generator-api

المرتبات

المرتبات فيها كلام وتختلف طبعاً على حسب مستوى الخبرة، الشركة، اللغة وعوامل تانية كتير.

في rough estimate ممكن تحدد بيه الراتب وهو إنك تضرب تكلفة الساعة بتاعتك في عدد الأيام يعني لو قولنا بتتقاضى في الساعة 15$ يبقى 15 في 8 ساعات في 5 أيام في 4 أسابيع يساوي 2400$. هيساعدك جداً تحسب تكلفة الساعة بشكل مناسب إنك تشتغل فريلانس في الأول على Upwork أو أي بلاتفورم غيره وتتعامل مع شركات أجنبية وهتبقى خبرة حلوة هتفيدك لما تبدأ شغل ريموت بدوام كامل.

معظم المصادر بتتكلم عن الرواتب حسب البلد لكن حابب اتشارك معاكم المقالات دي:

• https://www.linkedin.com/pulse/angular-typescript-frontend-new-positions-hiring-lessons-ohtamaa/
• https://www.linkedin.com/pulse/remote-devops-engineer-positions-what-should-you-expect-ohtamaa/
• https://www.linkedin.com/pulse/hiring-remote-angular-nestjs-developers-stackoverflow-mikko-ohtamaa/
• https://www.linkedin.com/pulse/experiences-hiring-remote-flutter-developers-mikko-ohtamaa/